Աուդիտ
Աուդիտը կազմակերպության հաշվետվություններում ներկայացված տեղեկատվության ստուգումն է, որը սովորաբար իրականացվում է անկախ մարմնի կողմից: Աուդիտը վերաբերվում է կազմակերպության հաշվապահական հաշիվների, հաշվետվությունների, փաստաթղթերի համակարգային և անկախ ուսումնասիրությանը՝ իրական և ճշգրիտ պատկերին ֆինանսական հաշվետվությունների համապատասխանության աստիճանը պարզելու նպատակով: Աուդիտի միջոցով ապահովվում է նաև օրենքի տառին համապատասխան ընկերության կողմից հաշվապահական հաշիվների պատշաճ պահպանությունը: ՀՀ §Աուդիտորական գործունեության մասին¦ օրենքի համաձայն՝ աուդիտորական գործունեությունը ֆինանսական հաշվետվությունների և (կամ) ֆինանսական հաշվետվություններ ներառող փաստաթղթերում առկա այլ տեղեկատվության աուդիտի և (կամ) աուդիտին հարակից ծառայությունների (աուդիտորական դիտարկում, համաձայնեցված ընթացակարգեր, կոմպիլյացիա (տեղեկատվության հավաքագրում) իրականացումն է: Աուդիտ նշանակում է աուդիտի ենթակա մարմնի ֆինանսական հաշվետվություներում պարունակվող տեղեկատվության անկախ ստուգում, որի արդյունքում պատրաստվում է աուդիտորական եզրակացություն: Աուդիտորական գործունեությունն իրականացվում է աուդիտորական գործունեությունը կարգավորող իրավական ակտերով: Աուդիտը և աուդիտորական դիտարկումն աուդիտ իրականացնող անձին հնարավորություն են ընձեռում տեղեկատվության արժանահավատության վերաբերյալ ապահովելու իր հավաստիացումը: Աուդիտորական ծառայության իրականացումն առանց լիցենզիայի արգելվում է: Աուդիտորական ծառայությունները պետք է իրականացվեն առնվազն մեկ որակավորված աուդիտորի կողմից: Աուդիտն անցկացվում է օրենքով սահմանված դեպքերում (պարտադիր աուդիտ) կամ աուդիտի ենթարկվող անձի նախաձեռնությամբ (կամավոր աուդիտ):