Հարկային ոլորտում հայ-բելառուսական համագործակցությունը նոր փուլ է մտել

Մայիսի 19-ին ՀՀ ԿԱ պետական եկամուտների կոմիտեի նախագահ Հովհաննես Հովսեփյանը և Բելառուսի Հանրապետության հարկերի և գանձումների նախարար Սերգեյ Նալիվայկոն ստորագրել են «ՀՀ և ԲՀ կառավարությունների միջև եկամուտների և գույքի կրկնակի հարկումը բացառելու և հարկումից խուսափելը կանխելու վերաբերյալ» 2000թ. հուլիսի 19-ի համաձայնագրում փոփոխություններ և լրացումներ կատարելու մասին արձանագրությունը` համաձայնագրի դրույթները կհամապատասխանացվեն առկա զարգացումներին, ինչպես նաև կկարգավորվեն գործնականում առաջացած խնդիրները: Այդպիսով հնարավորություն կստեղծվի կատարելագործել Հայաստանի և Բելառուսի ռեզիդենտների հարկման կարգը` ընդլայնելով երկու պետությունների իրավասու մարմինների միջև համագործակցությունը: Հովհաննես Հովսեփյանը հույս է հայտնել նաև, որ շուտով երկու գերատեսչությունները կընդլայնեն հարկային տեղեկատվության փոխանակումն ու կանցնեն միջազգային չափորոշիչներին համապատասխան տեղեկատվական հոսքերի ավտոմատ համակարգերի կիրառմանը. «Փոփոխությունները կնպաստեն Հայաստանի և Բելառուսի կառավարությունների միջև հարկման բազայի տվյալների փոխանակմանը, հարկային իրավախախտումների կանխարգելմանը, ինչպես նաև հարկերից խուսափելու դեմ պայքարին: Այսօրվա հանդիպումը դիտարկում ենք որպես Հայաստանի և Բելառուսի հարկային գերատեսչությունների միջև գործակցության խորացման հերթական փուլ, ինչը կնպաստի հարկային ոլորտում հայ-բելառուսական կապերի ընդլայնմանն ու ամրապնդմանը»: Բելառուսի  հարկերի և գանձումների նախարար Սերգեյ Նալիվայկոյի խոսքով` արձանագրությունը թույլ կտա ավելի հստակ կանոնակարգել աշխատանքը երկու երկրների հարկային ծառայությունների միջև` ապահովելով արդար մրցակցություն բարեխիճ հարկատուների համար: